எங்க ஊரு நகரப்பேருந்து,

            சமயத்தில் நகரா,

,           பெருமளவு,..நரகப்பேருந்து.

            பழகிட்டு... 

            வேகமா'போறேன்னு விலா ஒடிக்காது;

            நின்னு போனாலும், வேற ஒன்னு வரும்.

            என்னைய மாதிரி வயசாளிக்கு பாதுகாப்பு.

            அன்றைக்கு மழை.

            வெளியே      தூற, 

            உள்ளே கொட்டுகிறது .

            குந்த இடமின்றி 

            எழும்பிய பயணியருடன்

             நிற்போரும்    நெரிய

             மண்டும் எரிச்சலில் 

             மானாங்காணியாய் 

..            வசவு மழை! 

               களேபாரத்துக்கிடையே

               கெக்கலி கொட்டியது

               ஒரு குழந்தை,

               தாயின் இடுப்பில் இருந்தபடியே 

               தாரையாய் வடியும்             

               மழை நீரை

               பிஞ்சுக்கைகளில்

               பிடிக்க முனைந்து 

               களித்து , வெடித்து, சிரித்து 

               கும்மாளியிட்ட

               குழந்தையை நினைந்தும்,

                நனைந்தும் 

                மழலை மழையில் 

                நான்.